2016 оны 01 сарын 15

Булган аймгийн Сайхан сумын харьяат аймгийн алдарт уяач Ойдовын Мятавын хар гэж орон нутагтаа босоо хурдан морь байв. Энэ хүлэг уул гарал Архангай аймгийн Өлзийт сумын өөлдийн адуу юм гэнэлээ. 1989 онд О.Мятав уяач адуучин Нямсүрэнгээс орных нь морийг өгч найман настай битүү морь худалдаж авчээ. Цогио тасрахгүй хаа ч хүргэдэг сайн хүлэг байсны учир хоосонгүй хэмээн горьдож уях болсон нь алдаагүй юм.

1990 онд Сайхан сумандаа аман хүзүүдүүлж, 1991-1995 он хүртэл завсаргүй таван жил Сайхан сумын баяр наадамд түрүүлгэж гайхуулсан байна. 1993 онд Уурхайн наадамд, 1994 онд Уурхайн 30 жилийн ойд дахин түрүүлжээ. 1996 онд Могодод очиж уралдан тавд давхиж, Намхай аваргын кино зураг авалтын баяр хэмээх өргөн наадамд мөн тавд давхижээ. 1997 онд 16 насандаа Сайхан сумынхаа баяр наадамд дахин дэвжээгээ эзэгнэн түрүүлсэн байна. Тэр жилээ  Эрдэнэт хотод болсон хангайн бүсийн уралдаанд 400 гаруй моринд очиж уралдан айргийн тавд хурдалжээ.Тус наадамд унасан ач хүү Бавуудорж нь хар морийг их араас гарч дөчин хэд дээрээс нэхсээр айрагдсаныг нь бахдалтай дурсдаг юм. 1998 онд Их хурд уралдаанд урилгатай очиж уралдан 52-т хурдлав. 1999 онд Булган аймагт 12-т давхиж, 2000 онд Сайхан сумынхаа гурван түмэн адууны баярт 19 настай уралдаж зодог тайлсан түүхтэй.

О.Мятавын хурдан хүрэн азарга Могод сумын хоёр түмэн адууны баярт түрүүлж, бага дөрвөн насандаа айрагдаж түрүүлсэн, сумандаа хоёр аман хүзүүдэж, 1997 оны Булган аймгийн 60 жилийн ойд гуравт хурдалсан хурдан хүлэг байв.

Сайхан сум айрагны сайхан, аварга арслангуудаараа алдартай ч улсын бүсийн уралдаанд орон нутгаасаа ирж морь айрагдуулсан цорын ганц хүн нь их уяач Ойдовын Мятав юм.

Сэтгэгдэлүүд
  • ts IP:202.179.11.42 2016 оны 01 сарын 18

    saihan hyleg
  • Oko IP:103.57.93.87 2016 оны 01 сарын 21

    Minii uvuu chin mundag uyach bsiim shuu.
  • Oko IP:103.57.93.87 2016 оны 01 сарын 21

    Zuniihaa amraltaar bainga ochdog bsan. Uvuu maani zun guugee barina. Hajuugaar ni har morio bainga halamjilna. Har moritoigoo yarichaad orj irlee gj yaridag bsan. Guunii zelen deer hamt bj bhad ni hurtel ochij harj bsan uneheer hoorondoo oilgoltsood yariad bga yum shig danagddag bsan. Ohin ni taniigaa sanaj bnaa.
Сэтгэгдэл